Американската компанија „Трансформ Холдко“, сопственик на „Сирс“ и „Кејмарт“, затвора 96 продажни локации или околу третина од објектите на двата малопродажни гиганта.
„Сирс“ и „Кејмарт“ се едни од најстарите синџири на стока за широка потрошувачка во САД со традиција од 19 век, но последните години се соочуваат со тешкотии. „Сирс холдинг“ од 2011 година работи со загуби, не може да ја издржи конкуренцијата со онлајн продавниците, па лани во октомври отиде во стечај.
Холдингот во 2019 година беше откупен од милијардерот Еди Ламперт за 5,2 милијарди долари, по што сопственик стана „Трансформ Холдко“, компанија создадена специјално за тоа и управувана од инвестициски фонд на Ламперт.
Во минатото „Сирс“ поседуваше 3.500 продавници, а кога беше откупен од Ламперт, малопродажниот гигант имаше само 425 продавници. Неколку месеци подоцна се стави клуч на нови 150 и сега по затворањето на уште 96, ќе останат да работат само 182 продавници. Затварањето ќе почне во декември и ќе трае до февруари.