Србија во наредните години ќе побара прием во НАТО, оценува директорот на белградскиот Форум за етнички односи, Душан Јањиќ.
„Очекувам дека реконструираната влада на Србија, во наредните година дена ќе ја промени политиката и ќе побара членство во НАТО“, изјави Јањиќ за црногорскиот портал „Аналитика“.
Јањиќ објаснува дека „со заминувањето на Борис Тадиќ од функцијата претседател, јасна е промената на односот на Србија кога е во прашање НАТО и ќе се направи нова стратегија по тоа прашање“.
„Можеби делува апсурдно, да некој кој ја наследил политиката на Милошевиќ и потекнува од Српската радикална партија, да иде кон Нато, но тоа е факт“, дополнува Јањиќ.
Според неговите зборови, со договорот на Белград и Приштина, се прифаќа територијалниот интегритет на Косово, а тоа е важно за членството на Србија во Европската унија и НАТО.