„Немам точни податоци како постапувале судовите во Приштина, каква одлука донеле, но верувам дека одлуката е таква каква што вие ја презентирате и доколку тоа е случај навистина морам да изразам жалење за ставот на тамошните власти тие да не бидат испорачани на Република Македонија“, рече министерката Јанкулоска по барање на новинарите да ја коментира денешната одлука на приштинскиот суд да ги казни провообинетите за „Монструм“, Демири и Исмаиловиќ на две односно две и пол години затвор за нелегално поседување оружје, со што се доведува во прашање нивната екстрадиција.
Демири и Исмаиловиќ во Македонија се обвинети за петкратното убиство кај Смилковско Езеро, но во март беа уапсени во Приштина за нелегално поседување оружје.
Претходно, министерот за правда на Македонија, Блерим Беџети, изјави надеж за средување на постапката на екстрадиција.
„Ние сме во комуникација со косовскиот министер за правда. Сè уште не сме официјално известени, но по сознанијата што ги имаме, факт е дека обвинетите таму имаат сторено кривично дело. Факт е дека од правна гледна точка треба да заврши постапката во Приштина, а потоа ќе добиеме и одговор за екстрадиција“, изјави министерот во мај.
Судскиот процес за петкратното убиство, во отсуство на двајцата првоосомничени, почна на 20 декември 2012 година, а на обвинителната клупа седнаа Агим Исмаиловиќ, Фејзи Азири, Рами Сејди и Хаки Азири.
На 12 април минатата година кај Смилковското езеро беа убиени Кире Тричковски, Филип Славковски, Цветанчо Ацковски, Александар Наќевски и Борче Стефковски.