Претседателот на Украина Виктор Јанукович денес рече дека во државата е направен државен удар и одби да даде оставка додека истовремено опозицијата почна да ги освојува сите делови на власта а парламентот изгласа ослободување на опозиционерката Јулија Тимошенко.
«Ова е државен удар и немам намера да дадам оставка», рече Јанукович кој се наоѓа на истокот на земјата во Каркив. Тој додаде дека нема да ја напушти земјата ветувајќи дека се ќе стори да не дојде до крв на улиците.
Попладнево опозицијата во парламентот гласаше деституција на претседателот и најави избори за 25 мај.
Володимир Рибак, претседателот на украинскиот парламент и близок соработник на претседателот Виктор Јанукович, сабајлево поднесе оставка на оваа функција. Истовремено, во последните часови, повеќе пратеницу на Партијата на регионите која е на власт, се одлучија за истиот чекор.
Александре Турчинов, десната рака на Јулија Тимошенко, беше избран денес за нов претседател на украинскиот парламент.
Армијата од своја страна преку соопштение рече дека нема да влегува во конфликтот.
По гласањето на ослободувањето на Тимошенко нејзините поддржувачи се собраа пред болницата во која таа е на лекување, блиску до затворот на Каркив и скандираа «Јулија, те чекаме!».
Во истиот град на истокот на земјата е и Јанукович кад што учествува на конгрес на политичари од про-рускиот исток на земјата. Овие политичари сметаат дека парламентот во овој момент не е легитимен и дека работи под вооружена закана. «Одлуките на парламентот донесени во вакви услови не тераат да не верваме во добрата волја на институцијата, нејзиниот легитимитет и легалноста. Територијалниот интегритет на земјата е под закана», сметаат тие.
Да потсетиме дека Украина со своите 46 милиони жители е поделена помеѓу источниот русофилски дел и западниот украинофилски дел.
На плоштадот Мајдан илјадници луѓе се се уште собрани во очекување на вести од политичката ситуација. Многумина носат цвеќиња за да им оддадат почит на 80те загинати во последните денови.
На меѓународниот дипломатски план земјите на ЕУ сметаат дека ситуацијата и натаму е кревка. Според францускиот шеф на дипломатијата економската ситуација на Украина е загрижувачка. Русија вети кредит од 15 милијарди долари и намалување на цената на гасот. Од оваа сума во декември се испратени три милијарди но неделава Москва го повлече плаќањето на уште две милијарди така што испраќањето на остатокот е неизвесно.
Агенцијата Стандард анд Пурс најави дека Украина, која мора да врати сума од 13 милијарди долари од долгот, ќе се најде во голема незгода доколку Русија не ја испрати помошта. ЕУ најави помош од 610 милиони евра, но оваа сума е не може да го надомести долгот што треба да се плати.
Русија изјави исто така дека опозицијата е закана за сувереноста на Украина.