Сега веќе поранешниот претседател на Украина Виктор Јанукович планирал да употреби илјадници полицајци за да ги растера демонстрантите, покажува документ објавен на интернет.
Украинските новинари пронашле документи во близина на раскошната резиденција на Јанукович кај Киев, од кои дел се нашле на интернет.
Иако со сигурност не може да се потврди нивната автентичност парламентарниот застапник Генадиј Москал, поранешен заменик министер за внатрешни работи, објави документ со детали од планот како Плоштадот на независноста, лулката на бунтот, да биде опколена со снајпери и да се пука врз демонстрантите.
Во акцијата би учествувале оклопни возила и 22.000 полицајци, вклучувајќи и околу 2000 припадници на силите на Беркут.
Москал е член на партијата на поранешната премиерка Јулија Тимошенко, кој вели дека со објавувањето на докментот сака да изврши притисок за приведување на Јанукович и за изведување пред лицето на правдата.
Јанукович побегна од Киев во петокот вечерта, парламентот го разреши во саботата, а вчера беше издаден налог за негово апсење поради извршени масовни убиства.
Најмалку 88 луѓе беа убиени минатата седмица во борбите со огнено оружје меѓу полицијата и демонстрантите во Киев.
За време на протестите се повредени 699 луѓе, од кои 463 се наоѓаат в болница.
Минатонеделеното насилство на улиците во главниот град на Украина беше најлошото во државата откако таа стекна независност во 1991 година.
Во Украина и официјално почна кампањата за предвремените претседателски избори што се закажани за 25 мај годинава.
Досега останува непознато каде се наоѓа отстранетиот претседател Виктор Јанукович кој во саботата го напушти Киев. Централната изборна комисија даде рок до 4 април за поднесување кандидатури за претседателската трка.
Лидерот на партијата УДАР Виталиј Кличко најави дека ќе се кандидатира, а како на потенцијален кандитат се гледа и на експремиерката Јулија Тимошенко која во саботата беше ослободена од затвор.