Јато агресивни риби изгризале повеќе од 70 капачи на популарна аргентинска плажа. На едно седумгодишно дете во болница морале делумно да му ампутираат прст на раката, а на десетици други капачи им настрадале екстремитетите, пренесува BBC.
Капачите ги нападнале риби од семејството паломета, сродни на пираните, изјавил Федерико Корние, директор на брзата помош во градот Росарио.
„Ова не е нормално“, изјавил Корние. „Нормално е да има изолирани случаи на гризнувања и повреди, но ова е исклучителен случај“.
Нападот се случил на популарна плажа на реката Парана во близина на Росарио, 300 километри северно од Буенос Аирес. Плажата е омилена дестинација за многу Аргентинци кои за време на празниците бараат спас од жештините.