Како и за сите други истраги, за осомничениот и во предметот во јавноста познат како „Плацеви на Водно“ се подготвува барање за екстрадиција на Никола Груевски од Унгарија, соопшти Јавното обвинителство за „Слободен печат“.
Јавното обвинителство на РСМ потврди и дека при претресите во становите на Груевски пронајдени се повеќе предмети. Обвинителството сепак ќе ги чека извештаите од МВР како надлежен орган за вршење на претресите па ќе одлучи со кои информации ќе излезе во јавност за да не се попречува натамошното водење на истрагата.
-Претресот е во рамки на истражните дејствија во предметот во јавноста познат како „Плацеви на Водно“, соопштуваат од ЈОРСМ.
Исто така во стан на екс премиерот Груевски откриени се и одземени 4 пиштоли за кои тој немал дозвола. Оружјето е предадено на вештачење.
Оттаму потврдуваат дека по барање на Основното јавно обвинителство за гонење на организиран криминал и корупција , а по сознанија за постоење на докази важни за истрагата, извршен е претрес во четири објекти кои ги користел осомничениот.
Според наодите на обвинителството за случајот „Плацеви на Водно“, Груевски преку донациите за партијата собрал 1,3 милиони евра и тоа во периодот од 2006 до 2012 година. Потоа во периодот од октомври 2012 до септември 2013 со овие пари ги купил плацевите.