Владата на Србија одлучи Јованка Броз да биде погребана во Куќата на цвеќето во Белград, во
просторијата до која е погребан нејзиниот сопруг, претседателот на поранешна СФРЈ, Јосип Броз Тито, јавува Танјуг.
Според потпретседателот на Владата Расим Љајиќ денеска во 15 часот, на првата седница на Организациониот одбор ќе бидат договорени деталите за погребот.
-Во одборот ќе бидат и претставници на семејството изјави Љајиќ.
Српските медиуми јавуваат дека се разгледува можноста да биде организиран и државен погреб. Работите околу адаптацијата на просторијата ќе започнат веднаш штом ќе бидат утврдени деталите за погребот.
Куќата на цвеќето е изградена во 1975 година како зимска градина за претседателскиот пар.
На средината имало фонтана, која во 1980 година била тргната за да се направи место за гробот на Тито.
Јованка Броз почина вчера во 11 часот и 45 минути во Белград во 89 година, поради престанок на работата на срцето, соопштија од Клиничкиот центар во Србија.