„Најверојатно ќе донесеме одлука таа да биде закопана во Куќата на цвеќето, во соседната просторија покрај централната во која е закопан нејзиниот сопруг, Јосип Броз“, изјави за Танјуг, потпретседателот на српската влада и министер за трговија, Расим Љајиќ, инаку еден од ретките функционери кои што последниве неколку години имал директен контакт со Јованка Броз.
Сопругата на поранешниот претседател на СФРЈ, Јосип Броз Тито, Јованка Броз почина денеска во 11:45 минути по локално време во Белград.
Таа во ургентниот центар во Белград, беше примена пред два месеци во тешка здравствена состојба, целосно запуштена, со дијагностициран рак на кожа и сепса, резултат на 30-годишната самотија со која се бореше по смртта на Тито.
Таа е родена во 1924 година, а во 1952 година се омажила за Јосип Броз Тито со кого живееше до неговата смрт во 1980 година. Јованка Броз изминатите години живееше во скромни услови во белградската населба Дедиње.
Владата на Србија најави дека утре ќе формира организациски одбор за испраќање на Јованка Броз, и дека тогаш ќе се одреди датумот на погребот.