Во 1963 година, по катастофалниот земјотрес во Скопје, градот стана центар ба светската солидарност. Од сите страни на светот стаса помош за изградба на Скопје. ЈСП и ЈСП Турс со “Рута на солидарноста” ќе ја одбележат 55-годишнината од катастрофалниот земјотрес во 1963 година и сакаат да потсетат на местата во градот што беа изградени во помошта на нашите пријатели во светот.
Турите се планирани на 24, 25 и 26 јули, со две поаѓања, во 11 и 17 часот . Двете тури на 24 јули ќе бидат бесплатни, а за останатите цената на билетот ќе изнесува 150 денари.
– Со овој мал гест сакаме да искажеме благодарност и почит кон сите што му помогнаа на Скопје, а истовремено да пратиме порака дека Скопјани никогаш нема да ја заборават подадената рака и светската солидарност по катастрофата во 1963 година, соопшти ЈСП Скопје.
Почетна станица ќе биде местото каде што е родена Мајка Тереза, паркчето пред зградата на ЕВН на плоштад. Оттаму автобусот ќе се упати кон Стара железничка станица, потоа ќе вози кон населбите Тафталиџе 1 и 2, кои се изградени со помош на светската солидарност, ќе продолжи по улиците „Варшавска“, „Прашка“, „Лондонска“, „Осло“, „Хелсинки“, па преку „Московска“ по булеварот „Партизански одреди“ автобусот ќе минува спроти поликлиника „Букурешт“, подарок од Романија.
Туристичкиот автобус потоа ќе се упати покрај местото на уништените блокови во Карпош 2, па покрај Универзална Сала (подарок од Бугарија) и блоковите од Градски Ѕид (проект на архитектот Кензо Танге), ќе стаса до стариот театар и кај зградата на МОБ. Турата ќе заврши повторно на плоштад кај родната куќа на Мајка Тереза на платото пред зградата на ЕВН.