Водечкиот кандидат на конзервативните партии на изборите за Европскиот парламент, Жан-Клод Јункер, е убеден дека ќе биде иден претседател на Европската комисија. Британците се против, се заканија со излегување од ЕУ, објавува Дојче веле на македонски јазик.
„Во Европскиот совет ме поддржува широко мнозинство на демохристијански и социјалистички шефови на држави или влади“, изјави поранешниот премиер на Луксембург Жан-Клод Јункер за весникот „Билд ам зонтаг“. Според него, во идните недели согласност треба да дадат и останатите.
Јункер побара од своите поддржувачи да не подлегнуваат при одлуката под притисокот на малцинството: „Европа не треба да дозволи уцени“, изјави Јункер, без да именува никого. Но, 59-годишниот политичар алудира на Велика Британија, Унгарија, Шведска и Холандија.
Според информации на „Билд ам зонтаг“, и Франција застанала на страната на Јункер. Претседателот Франсоа Оланд сакал инаку на чело на ЕК да доведе Французин, пишува весникот без да ги наведува изворите.
Оланд на германската канцеларка Ангела Меркел и изјавил дека по успехот на десноекстремниот Национален фронт на европските избори во Франција, неговата влада која претрпе неуспех има итна потреба од некаков сигнал. Тој инсистирал на итна инвестициска програма за француската ослабена економија и во игра за функцијата претседател на Европската комисија го внесол својот поранешен министер за финансии Пјер Московици.
Британскиот премиер Дејвид Камерон, предупреди дека неговата земја може да ја напушти Европската унија, доколку поранешниот премиер на Луксембург Жан-Клод Јункер, стане следниот претседател на Европската комисија, објави германскиот магазин „Шпигел“.
Наведувајќи извори блиски до учесниците на самитот на лидерите на ЕУ одржан во вторникот, германскиот магазин пишува дека Камерон ја предупредил германската канцеларка Ангела Меркел дека поставувањето на Јункер на таа функција ќе ја „дестабилизира неговата влада до таа мерка што може да доведе до референдум за излез од ЕУ“, што веројатно како резултат ќе има одлука на народот земјата да го напушти блокот.