Ако некој сака да стане мајстор во професијата, најпаметно е да започне како чирак. Успешните луѓе зад себе имаат бројни неуспеси кои придонеле тие денес да бидат тоа што се.
Да се биде новинар во Македонија е голем предизвик. Да се биде млад новинар во Македонија е уште поголем предизвик.
Од една страна, колку и да звучи бизарно, полезно е тоа што се уште никој не ги препознава во јавност, па така не се изложени на притисокот дека можат да бидат нападнати вон работното време вербално или физички, како што често се случува со популарните новинари во Македонија.
Но од друга страна потешко се пробиваат до изворите за информации, било формални или неформални. Да се добие официјална изјава од институциите во Македонија и онака е тешко, а станува уште потешко кога сте за јавноста анонимен новинар. Тоа секако се должи на младоста, немањето контакти и неискуството, но дали работите во Македонија се така поставени, или тоа може да се смета единствено како цена на младоста?
Поразговарав со Елена Милошевска која како новинарка во македонските медиуми работи нешто повеќе од една година. Таа ми раскажа за предизвиците со кои се соочува во текот на секојдневното работење како телевизиски новинар.
– Младите новинари во Македонија, се соочуваат со разни предизвици и проблеми секој ден. Пред се, мислам дека еден од наголемите проблеми е што немаме соработка со државните институции, бидејќи како релативно нов новинар кој допрво има да учи уште многу, никој не те сфаќа сериозно, што за жал е многу погрешно. Се случува да не можеме да стапиме во контакт, за да добиеме и најосновна информација – вели Милошевска.
Впечатокот кој Милошевска го добила во текот на работењето како новинар е дека да се биде новинар во Македонија не е многу почитувана професија од страна на граѓаните.
– Исто така во земјава, пред се владее еден страв, одбивност и несигурност , општо кон новинарството како професија. Луѓето не веруваат во веродостојноста во информациите кои ги пласираат македонските медиуми – вели Милошевска.
Предизвикот да се дојде до изјава не е единствено кога се во прашање институциите и јавните личности, туку општеството генерално е дефанзивно поставено кон новинарите.
– Кога се прави анкета, на улица луѓето бегаат како да виделе ѓавол, а не микрофон и камера. Честопати не сакаат да зборуваат, на теми кои не се ни од политички карактер – вели Милошевска.
Младите новинари ја имаат енергијата која можеби на повозрасните новинари веќе им недостасува за да се изборат со предизвиците кои известувањето во Македонија секојдневно ги носи. Сепак останува отворено прашањето колку младите луѓе ќе сакаат да работат како новинари во Македонија.
*„Проектот е финансиран од Европската Унија преку програмата за мали грантови „Заштита на медиумските слободи и слободата на говор во Западен Балкан“ имплементиран од Здружението на новинари на Хрватска како дел од Регионалната платформа за застапување на медиусмките слободи и безбедност во Западен Балкан во партнерство со шест организации од регионот (Независното здружение на новинари од Србија, Здружението на новинари од БиХ, Хрватсото здружение на на новинари, Здружението на новинари од Македонија и Унијата на медиумите од Црна Гора”.