„Победија правдата и принципите наспроти сите предизвици со кои се соочивме. Република Македонија положи сериозен тест на зрелост и избегна опасен преседан“, рече премиерот Никола Груевски вечерва на прес-конференција на која што го обзнани тоа што било договорено на денешната средба со европската тројка Филе-Ховит-Бузек кај претседателот Ѓорге Иванов за, како што рече, да нема забуна и погрешна, случајна или намерна погрешна интерпретација.
-Кај претседателот на државата денеска се постигна договор за враќање на опозицијата во Парламентот и за настап на предвидените локални избори, без притоа да има условувања за организирање на предвремени парламентарни избори, или одложување на локалните избори. Со ова државата избегна еден опасен преседан, кој можеше скапо да не чини не само нас како генерација, туку и следни генерации по нас, истакна Груевски.
Лидерот на опозиционата СДСМ, Бранко Црвенковски, после одржаниот Централен одбор во седиштето на партијата вечерва изјави дека после два месеци жестока политичка битка и протести по улиците низ цела Македонија, се изнаслушавме од премиерот дека никанов договор за предвремени парламентарни избори нема да има.
„Денес е постигнат политички договор зад кој како гарант стои ЕУ, дека веднаш после локалните избори почнуваат преговори за предвремени парламентарни избори и тие преговори мораат да завршат со дефинирање на датумот најдоцна до почетокот на септември“, изјави Црвенковски.