Британскиот премиер Дејвид Камерон не попушта во спорот околу назначувањето на Жан-Клод Јункер за нов шеф на Европската комисија и сака да изнуди гласање.
Доколку има подготвеност да се бара алтернативен кандидат, тогаш носењето одлука треба да се одложи, оцени неименуван претставник на владата во Лондон, јавува Дојче веле на македонски.
Доколку нема таква подготвеност, и покрај „многупати изразената резерва“ во однос на Јункер, „тогаш треба да се гласа“, се вели во Лондон. Камерон смета дека е „важно секој шеф на држава или влада јасно да го изнесе својот став“.
Шефовите на држави или влади на ЕУ се среќаваат в четврток во Брисел на самит на чиј дневен ред е и ова прашање. Советот мора да се усогласи околу еден кандидат со квалификувано мнозинство, а потоа тој кандидат треба да добие потврда и од Европскиот парламент. Камерон со недели се обидува да спречи именување на Јункер за шеф на ЕК.
Според британскиот премиер, Луксембуржанецот не е вистинскиот човек кој би спровел длабоки реформи во ЕУ какви што бара Велика Британија.
Вчера во Париз социјалдемократските шефови на држави или влади во ЕУ застанаа зад Јункер, иако тој припаѓа на конзервативната Европска народна партија и беше нејзин врвен кандидат на европските избори. Со тоа натамошно се намалија шансите на Камерон во борбата против Јункер.
Отпорот на Камерон се должи и на длабоката ЕУ-скепса на британското население. Доколку биде реизбран наредниот мај, Камерон сака да им остави можност на Британците во 2017 година да гласаат за излегување или за останување во ЕУ. Според едно истражување на „Обсервер“, во моментов 48% од граѓаните би биле за излегување, а 37% за останување во Унијата.