Тест за Ковид направен во Германија изнесува 18,74 евра или 1.152 денари. Толку е и набавната цена која реално се движи околу 20 до 25 евра, некаде и помалку. Во нашата држава во приватните лаборатории ПСР тестовите се движат од 3950 за тест кој ќе биде готов за 48 часа, до 12 000, а некаде и над 14 000 денари за брз тест изработен за 8 часа
Министерството за здравство се уште не одлучило кога и како ќе постапува за трите лаборатории кои неовластено земале брисеви за Ковид и не се наоѓаат на листата на лаборатории кои со дозвола од комисијата. Иако два месеца се знаело за нив, јавноста досега не е известена за ова, ниту се знае кога и како ќе постапува ресорното министерство.
Две од лабораториите имаат забрана за вршење на дејност надвор од дозволата од страна на Државниот санитарен и здравен инспекторат, по што е испратено известување до Министертвото за здравство за понатамошно постапување, потврдија од ресорното министерство.
Третата „Ели медика“, од Струмица по издаденото решение за забрана надвор од дејноста, се жалеле на второстепена комисија на Влада и додека не се добие одговор од таму, министерството не може да постапува. И додека во Македонија на големо “цвета“ бизнисот со тестови за Ковид во приватните лаборатории, а цените се астрономско високи, во земјите од ЕУ или не се наплаќаат или нивната сума е реална, многу блиску до набавната.
Граѓаните негодуваат, а на социјалните мрежи се споделуваат статуси со цени во некои од европските земји. Ова е тест за Ковид, направен во Германија и неговата цена е 18,74 евра или 1.152 денари. Толку е и набавната цена која реално се движи околу 20 до 25 евра, некаде и помалку.
На пандемијата со коронавирус не и се гледа крајот, на есен се најавува црно сценарио во повеќе земји, за што и нашата држава се подготвува со болнички капацитети.
Но, државата никако да воведе единствени цени за тестовите во сите лаборатории, тие да бидат исти како и во јавното здравство, ниту пак да превземе мерки за ваквите напумпани цени кои удираат директно по џебот на граѓаните.
Како што објави НОВА пандемијата со Ковид многу приватни болници и лаборатории ја искористија за брза заработувачка. Цените на ПСР тестовите се движат од 3950 за тест кој ќе биде готов за 48 часа, до 12 000, а некаде и над 14 000 денари за брз тест изработен за 8 часа.
Од почетокот на пендемијата до денес во приватните болници и лаборатории направени се 56 423 тестирања на Ковид-19. Тоа се 40 проценти од вкупно направените тестови во државата. Со тоа приватните лаборатории заработиле над 3, 5 милиони евра, пресметано по цена која важи од 27 април годинава. Ако на тоа се додадат и брзите тестови кои се три пати поскапи, како и серолошките, сумата ќе биде многу поголема.
Додека многу фирми пропаѓаат, пандемијата со коринавирусот на многу приватни болници и лаборатории им овозможи да профитираат брзо. Во нашата држава затаи солидарноста, а државата не превзема никакви мерки за да се ублажи состојбата.