Државниот секретар на САД, Џон Кери денес во Минхен разговарал со министерот за надворешни работи на Иран, Мохамед Џавад Зариф за средбата следниот месец за конечно решение на иранската нуклеарна програма и најавил дека американските санкции кон Иран и понатаму остануваат во сила.
Како што јави Ројтерс, тие разговарале на маргините на Безбедносната конференција во Минхен.
„Секретарот Кери повтори дека е од голема важност што двете страни разговараат со добра намера и дека Иран ги почитува своите обврски спрема заедничкиот акциски план. Тој јасно рече дека САД ќе продолжат да ги применуваат санкциите спрема Иран“, вели неименуван извор од Стејд департментот.
Според договорот постигнат во ноември минатата година, Иран се обврза да ја намали програмата за збогатување на ураниумот за да се отстранат сомневањата дека има намера да произведе нуклеарно оружје, а за возврат ќе му бидат намалени санкциите.
Претходната рунда разговори, кои доведоа до клучниот преоден нуклеарен договор, е одржана во ноември во Женева, а спроведувањето на договорот почна на 20 јануари.