КФОР денеска соопшти дека го истражува инцидентот што се случи вчера во непосредна близина на патролата на КФОР во областа Зубин Поток, како и дека планира да разговара со сите страни, јави српската радиотелевизија.
КФОР на Фејсбук соопшти дека во инцидентот во реонот на Зубин Поток учествувале непознати вооружени лица, како и дека нема повредени или материјална штета, но дека се работи на утврдување на фактите.
„Бидејќи се планирани состаноците меѓу сите страни, важно е сите вклучени да избегнуваат каква било реторика или дејствија што можат да предизвикаат тензии. Очекуваме сите актери да се воздржат од демонстрации на сила и да го бараат најдоброто решение за да се обезбеди безбедноста на сите заедници“, соопшти КФОР.
КФОР додаваат дека „ги повикуваат сите страни да помогнат да се обезбеди безбедност и слобода на движење на Косово и да се спречат погрешните наративи да влијаат на процесот на дијалог“.
„Командантот на мисијата КФОР продолжува да го поддржува дијалогот за изнаоѓање договор за смирување на тензиите на северот на Косово и тој останува во контакт со сите вклучени во овој процес. Во последните месеци го зголемивме нашето присуство и патроли, и остануваме целосно способни да го исполниме мандатот според Резолуцијата 1244 од 1999 година за сите заедници во Косово. Решенија треба да се бараат преку дијалог“, се додава во соопштението на КФОР.