Некогашниот боксер, и сегашен политичар во Украина, Витали Кличко, нема да се кандидира на претседателските избори во земјата.
Неговата најава доаѓа откако Русија потврди дека нема намера да испрати војска во внатрешноста на Украина по предупредувањата од Западот.
Кличко, кој беше еден од најекспонираните во анти-Јанукович протестите низ улиците на Киев, на неговата партија УДАР и порача дека треба да целат кон целосно интегрирање во ЕУ.
„Треба да имаме заеднички демократски кандидат. Тоа мора да биде кандидат со најголеми шанси за победа. Верувам дека тој кандидат е Петро Порошенко“, рече на конвенција на партијата поддржувајќи го украинскиот бизнисмен Порошенко.
Тој воедно најави и дека ќе се трка за градоначалничката фотелја на Киев, бидејќи според него, сите реформи треба да започнат од таму.
Одлуката на Кличко ја отвора можноста за натпреварување на бизнисменот Порошенко и поранешната премиерка Јулија Тимошенко за изборите на 25 мај во Украина.