Кочанскиот градоначалник, Љупчо Папазов, кој пред два дена колабираше на прес конференција со партискиот лидер Христијан Мицкоски е позитивен на коронавирус, објави ТВ24.
Вирусот прво му е потврден со брз, а подоцна и со ПЦР-тест. Попладнево е прегледан, но не е задржан на болничко лекување. Засега нема информации дали и некој друг од 42 градоначалници кои без маски присуствуваа на прес-конференцијата е позитивен на вирусот или ќе оди во изолација.
Папазов вчера ја презеде градоначалничката функција, а оствари средба и со кочанските советници. Од утре работите во општината ќе ги координира од дома. Папазов се онесвести на прес-конференцијата што ја држеше претседателот на ВМРО-ДПМНЕ, Христијан Мицкоски, а тогаш како причина за колабирањето беше наведено прескокнувањето на појадокот, поради работните активности.