Лапсусите на францускиот претседател веќе една година ги полнат забавните интернет страници на неговата земја. Оној за Македонија која од францускиот изговор „Маседуан“ се претвори во „Маседони“ е последниот кој, се разбира, остана забележан кај внимателните набљудувачи на неговите говори.
На прес конференцијата во Брдо, Словенија, Франсоа Оланд одговораше на прашање за нашата земја и ја нарече „Маседони“.
Овој назив на нашата земја всушност и не е невообичаен во Франција каде што именката “маседуан” е назив за мешана салата од зеленчук или овошје и каде што многумина го користат токму ова име за да ја означат нашата земја.
Лапсусот на Оланд може да се објасни со тоа што претседателот, запознаен со проблемите околу нашето име со кои се среќаваме, можеби не сакал дополнително да не навреди со тоа што ќе ја нарече со името на добро позната салата.
А ако се одлучиме да го следиме објаснување на Фројд за кој ласпусот е симптом на појавата на потсвесни желби, може да се заклучи дека во моментот на прес конференцијата Оланд добил желба да касне салата!
Но лапсусите не се ништо ново за Оланд. Двата најзначајни, кои можеа да му донесат дипломатска криза, беа кога тој ги помеша Јапонија и Кина а еден месец подоцна Тунис и Египет.
На 7 јуни Оланд беше во официјална посета на Јапонија. На пресот со јапонскиот премиер, Оланд реагираше на смртта на 10 Јапонци во Алжир, жртви на киднапирање и своето сочувство наместо на јапонскиот народ, му го упати на кинескиот народ. За среќа, преведувачот на пресот ја исправи грешката.
Еден месец подоцна, во слична ситуација, на прес со тунискиот претседател Монсеф Марзуки, на Оланд му беше упатено прашање за државниот удар во Египет. „Франција ја следи ситуацијата во Тунис“, рече Оланд и предизвика смеа во салата каде што не станува збор за државен удар.
Во Израел пред една година Оланд измисли нов збор помеѓу „стратегија“ и „трагедија“. Реагирајќи во Израел на убиството во Франција извршено врз повеќе Евреи, Оланд рече „страгедија“.
Сличен лапсус му се случи во Шпанија каде наместо „заверка“ рече „заговор“ зборувајќи за начините на интервенција на Европската централна банка.
Еден од лапусисте кои најмногу им оставија впечаток на француските блогери е сепак оној на Ангела Меркел кога таа Франсоа Оланд го нарече Франсоа Митеран. Лапсус кој наиде на излив на смеа на сегашниот Франсоа (видео долу).