Како се почна со фрлањето бомби на Заев веќе и сами знаете, но ајде, бидете паметни и кажете- имал ли воопшто некој идеја, можело ли некој да предвиди дека ниту една драма на Шекспир не може да ја опише бруталноста и циркусот (Јанкуловска се повикува на Медрано) невиден во која се заплеткани сите ликови од лентиве на прислушкување.
Груевски сега се фаќа за пиштол кога зборува за “пучот на Заев”, слично онака како што Гебелс се фаќаше за пиштол кога ќе му го спомнеа зборот култура, но премиере, институциите се проклета работа, особено ако луѓето кои сега владеат наместо да служат, излезат да одговараат пред истите тие институции.
Затоа, да ја разгледаме состојбата на “лудаците”, што би рекол Ставревски кога говори за својата Влада, а кој како што одминува времето на лентите, се наоѓа на раб на самоубиство. Предизвикано од неговиот кум Груевски, но сепак е засенет од почесната титула атентатор на владеењето на ВМРО-ДПМНЕ, која сепак и припаѓа на Јанкуловска.
За министерката за полиција луѓето кои под притисоци биле приморани да гласаат за нив се будалетинки, човечиња, цигани, додека таа за време на изборите трчала горе-доле низ МВР со цел да ги понижува и да им се исмева на амбасадорите кои ја чекале во една канцеларија и верувале во нејзината претстава (на апсурдност), која ни Јонеску не би ја смислил подобро, додека таа спрат погоре ги координирала “изборите” за будалетинките.
За еден од мастермајндите на местење на изборите, Јанакиески, имаат пософистицирано име:
ГЈ: Расплинети сме до бесвест. И само се праат некои мегаломански работи, јас вчера се испокарав со Миле дур бевте у Демир Капија.
ЗС: Тој е едно од најголемите копилиња.
И после само еден ден, лично се појавува министерот за транспорт Миле Јанакиески, придружуван, од кого ако не од најмилата лопата и изјавува:
“За господинот Ставрески можам да кажам дека, покрај тоа што ми е колега, го чувствувам како еден многу близок пријател, кој е дел од моето семејство. И понатаму односите ни се одлични… ”
Се прашувам што ќе се случи со мајката на сите копилиња, министерот Јанакиески и со неговото семејство, откако се ќе заврши.
И тој и јас знаеме дека никогаш нема да им бидат блиски оние сироти и јадни, гологази и замусени, на кои извршители им исклучуваат струја и секнуваат вода, тие, што ја запоседнале оваа земја и се прогласиле за нивен народ. Истите тие, ајде пак да го цитирам Ставревски, немаат за леб а со наредба како да се работи за Третиот рајх, мораат да јадат чоколадо. Лудаци сме ние, вика Ставревски, додека страдалнички и се поверува на Јанкуловска дека се воздржува да му го тресне телефонот од глава на Груевски.
Значи, што ќе се случи кога ќе дојде оној ден, кога ќе дојде крајот. Мислите дека Груевски не е Санадер и дека неговите најбитни луѓе нема да му додадат јаже и со сласт ќе му ја потргнат столицата, како што тоа му го стори на Санадер лично Јандроковиќ, министерот за надворешни? Тоа многу од нив месециве го сторија, само слушајте ги лентите и верувајте и понатаму дека се во прашање странски служби, додека се трупаат материјали кај Заев и редот на довчерашните “лудаци” се зголемува за прием кај лидерот на СДСМ.
Некој ќе мора да остане сам и време е Санадер да му објасни како тоа иде и на Груевски.