Харизматичниот загрепски градоначалник Милан Бандиќ минатата ноќ ја помина во полиција откако беше уапсен под сомнение за корупција, злоупотреба на положбата и трговија со влијание. Со него се приведени 19 негови соработници меѓу кои претседателот на загрепскиот холдинг, односно сите јавни претпријатија под градот, неговиот советник, директорот на загрепската фабрика за отпад и други луѓе на раководни функции во градот и претпријатијата.
Конкретните дела за кои се товарат тој и соработниците се врзани за малверзации со градско земјиште, за штетен договор за складирање на отпадот во градот, сомнителни јавни набавки и незаконски вработувања, како и за незаконски трошења за време на политичка кампања.
Претресот во домот на Бандиќ според пишувањата на хрватските медиуми траел повеќе од 6 часа, а тој бил приведен во 2 часот по полноќ и однесен во полиција. Бандиќ, како што илустрира видеото превземено од хрватскиот портал „Индекс Хр“ со негодување ја прима веста за неговото апсење и се расправа со полицијата во гаражата.