Ниедно друго случување во светот на фудбалот не е ни блиску до „невремето“ кое владее во ФИФА – Светската фудбалска федерација, Асоцијација која важи за непрофитна. Од 2010 година, организацијата се најде затрупана во лавина наводи за корупција, особено по одлуките за доделување на организатор на светските првенства во 2018 и 2022 на Русија и Катар, анализира „Форејн Полиси“.
Неодамна светската Куќа на фудбалот објави извештај за внатрешните истражувања за различни наводи, и без поголемо изненадување во фудбалската јавност, соопшти дека одлуките за Русија и Катар се „добро промислени, цврсти и професионални“. И покрај тоа што се откриени серија нерегуларности и наидоа на пречки при истражувањето (како на пример уништени компјутери од руската делегација) ФИФА заклучи дека „инцидентите не можеле да влијаат на интегритетот на процесот за 2018/2022 како целина.
Во 2010 година британски „Сандеј Тајмс“ откри дека значителни членови внатре ФИФА земале поткуп за гласови при донесувањето на одлуките за организација на Светско. ФИФА исто така често е критикувана и за непреземањето мерки за обвиненијата дека се прекршуваат човековите права во Катар при подготовката на стадионите за 2022 година, а критикувана е и за поддршката на Русија и покрај меѓународните загрижувања за инвазијата на земјата на Путин врз Украина.
Минатата недела ФИФА се извини за објавувањето на промоционото видео за Светското првенство 2018 каде што Крим беше прикажан како дел од Русија. И покрај тоа што Русија „ги зема“ фудбалските тимови од Крим под свое закрило, УЕФА пак соопшти дека нема да ги признае резултатите на кримските клубови во руските фудбалски лиги.
Неодамна еден од британските пратеници случувањата околу ФИФА ги опиша како „белило“, мислејќи на корупцијата во Светската фудбалска организација. Американскиот истражител Мајкл Гарсија во однос на процесот при донесувањето одлука за Русија и Катар, заклучи дека
има „низа недоследности во материјалите и извртени факти“. Претседателот на германската Бундес лига др. Реиналд Робар отиде дотаму што рече дека УЕФА треба да ја напушти ФИФА доколку извештајот на Гарсија не биде објавен целосно.
Од друга страна самиот американски истражител достави жалба до внатрешниот Комитет за етика за одлуките на ФИФА околу неговиот извештај. Во меѓувреме еден од членовите на Комитетот пак, „Сандеј Тајмс“ го идентификуваше како примател на мито од Федерацијата на Катар.
Веќе долго време тешко е да се види како светските спортски организации го водат бизнисот. Парите инволвирани во организирање на едно Светско првенство во фудбал или Олимписки игри се огромни. Според наводите, Олимписките игри во Сочи се проценуваат на над 50 милијарди американски долари, додека последното Светско во фудбал во Бразил околу 15 милијарди, што беше и причина за протести и нереди во земјата, кога пред самиот почеток се појави и прашањето „Подготвен ли е Бразил и на кое ниво е безбедноста во земјата?“.
За некои од најголемите имиња во фудбалот, се уште не е јасно како ФИФА ги организира настаните без да одговара на никого. Одговорот треба да се бара во тоа што организацијата е технички непрофитна а огромното богатство кое го поседува е стекнато од телевизиски права и спонзорства. Дополнително, седиштето и е во Швајцарија и одговара само пред законите во таа земја.
ФИФА е организација на покровителство а гласовите во неа одат „една земја еден глас“. Но кога ФИФА ќе распредели милиони долари на сиромашните земји и нивните фудбалски програми, тоа купува лојалност, впрочем тоа е начинот на кој Сеп Блатер е првиот човек во организацијата со децении.
Спонзорите пак иако понекогаш објавуваат загрижувања за наводната корупција во телото на организацијата, сепак прават милијарди со учеството во неа, а ниеден спонзор до сега не се осудил сериозно да разгледа до каде води работата.
ФИФА за сега функционира без казни поради малата одговорност која ја има во надворешноста. Докажана е нејзината неспособност за стандарди кои одговараат на 21 век. Но што може да се направи?
– Време е националните влади да се вмешаат и да му помогнат на фудбалот и спортот воопшто, бидејќи вака нема многу причини кои наведуваат дека на повидок е промена, заклучува анализата на „Форејн Полиси“.