Денес пропадна уште еден обид за конституирање на парламентот на Косово по повеќе од два месеци по парламентарните избори. Косово е влезено во политичка криза која почнува да биде загрижувачка за ЕУ и САД.
Без влада не може да има напредок во преговорите со Белград. Дијалог кој ионака е бавен па дури и во кома.
Меѓународната заедница смета исто така Косово би можело да стане дом на исламистите во Европа. Според западните агенции, илјадници млади Косовари, без работа и обесхрабрени од нејасната иднина што стои пред нив, се почесто заминуваат за Сирија и Ирак во редовите на терористичката Исламска држава.
Без влада Косово не може да ги добие неопходните пари од меѓународните фондови. Шефот на мисијата на Обединетите Нации на Косово Захир Танин преупреди пред неколку дена дека кризата има штетно влијание на економски и социјален план и потсети дека меѓународните фондови ги откажуваат инвестициите и финаниската помош која уште како и е потребна на оваа мала и сиромашна држава.
Ако уште долго остане без влада Косово може да загуби речиси 80 милиони евра од фондовите на ЕУ, предупреди канцеларијата на ЕУ во Приштина. Програмата за помош од ЕУ мора да биде ратификувана до крајот на годината. Во спротивно, парите ќе се вратат во буџетот на ЕУ.
Меѓународниот монетарен фонд уште во јули ја запре исплатата на 16 милиони евра.
Оваа криза ја кочи и кандидатурата на Косово за влез во Унеско, организација на ОН за образование, култура и наука. Во 2015 година оваа кандидатура не успеа да ги добие потребните гласови во оваа меѓународна организација. Следната конференција на Унеско на која би можело да се поднесе новата кандидатура е закажана за октомври. За да поднесе нова кандидатура Косово мора да ги смени своите закони за слобода на религиите и за културното наследство а тоа без парламент е невозможно.
На оваа политичка криза има влијание и креирањето на специјален суд во Хаг кој треба да ги истражи и суди воените злосторства за поранешните членови на Ослободителната армија на Косово од периодот ја конфликтот со Србија во 1999 година. Според некои извори, овој суд треба да отвори случај за Хашим Тачи, поранешен шеф на оваа војска.
Последната влада на Косово падна пролетва откако дојде до несогласување за маркирање на границата со Црна Гора. На изборите на 11 јуни коалицијата ПАН (Демократска партија на Кадри Весељи, Алијанса за иднината на Косово на Рамуш Харадинај и Иницијатива за Косово на Фатмир Лимај) освоија 39 пратенички места од вкупно 120 во Парламентот. Тоа значи дека ПАН нема доволен број за формирање влада дури и ако коалицира со 10 пратеници од српската партија Листа српска и 10 од другите малински заедници.
Но сега ПАН тврди дека има доволен број гласови, со наводните три од Алијансата за Ново Косово на најбогатиот Албанец Беџет Пацоли.
Според Дојче Веле, кој цитира извори блиски до преговарачките тимови, Пацоли со само четири пратеници бара најмалку три министерски места, и тоа многу важни. Според истите извори, Пацоли навистина и ќе го добие она што го бара, зашто Весељи и Харадинај немаат друг избор.
Пацоли, како што дознава Дојче Веле “би можел да биде иден шеф на косовската дипломатија, што за Косово би можело да биде од голема полза, ако се знае дека тој има многу добри деловни и приватни врски со Русија и со бившите советски републики”.
Премиерското место најверојатно ќе му припадне на Рамуш Харадинај кој вчера од граѓаните на Косово побара трпение за формирање влада.
Според него, има најмалку три причини што го попречуваат брзото формирање и оти не планира да создаде какво било мнозинство.
„Прво, изборите донесоа резултат што сите го знаеме, второ, се наоѓаме пред една законска рамка која не дава олеснувања, и трето, ни најмалку не сум зинтересиран да формирам влада колку таа само да се формира. Доцнењето е за да се изнајде формула за содавање стабилни институции и поради тоа јавноста треба да не разбере“, напиша Харадинај на неговиот профил на Фејсбук.
Денес се одржа шестото продолжение на конститутивната седница на Парламентот но таа беше прекината. ПАН не обезбеди потребно мнозинство за избор на претседател на Парламентот. Седницата е прекината, а претседавачот рече дека новото заседание дополнително ќе биде закажано.
Единствен кандидат за прв парламентарец е лидерот на ДП Кадри Весели, кој и претходно беше на оваа функција.