Како што се наведува, поради едностраните потези на Приштина, Србите на северот на Косово поднесоа оставки од сите позиции во локалната самоуправа, судството и полицијата. Тие бараат од Приштина целосно спроведување на Бриселскиот договор, формирање Заедница на српски општини и повлекување на едностраната одлука за регистарските таблички.
Сите српски судии го завршија процесот на повлекување од Основниот суд во северниот дел на Косовска Митровица, пратениците од српската листа ги вратија пратеничките мандати на Собранието на привремените институции во Приштина, а српските полицајци од сите четири општини од северот на Косово кои исто така поднесоа оставки од утрово доаѓаат во полициската станица во Косовска Митровица за да ја раздолжат опремата и оружјето.
Од денеска Срби нема да има ниту во другите институции и служби формирани според Бриселскиот договор. Судските органи останаа без судии и обвинители, локалната самоуправа без администрација и функционери затоа што оставки поднесоа и општински и административни службеници.
И покрај незадоволството на Србите од политиката на владата во Приштина на северот на Косово деновиве е мирно, а утрово редовно почна наставата во училиштата, отворени се и здравствените установи, а дуќаните се добро снабдени.
Се очекуваат дипломатски и политички решенија за настанатата криза во односите меѓу локалните Срби и владата во Приштина.
Американската амбасада во Приштина побара од косовскиот премиер Албин Курти веднаш да формира Заедница на српски општини. Од амбасадата бараат и од Србите да се вратат во институциите, предупредувајќи дека актуелните спорови, како што велат, имаат капацитет дополнително да ескалираат на терен.
На синоќешната седница на Владата во Приштина, Албин Курти рече дека „не може да се загрозат законитоста и уставноста а дијалогот и институциите немаат алтернатива“.
Курти го повтори повикот до Србите да не ги бојкотираат и да не ги напуштат косовските институции, за кои рече дека им служат на сите без разлика.
Протестот на Србите уследи по потегот на Приштина, без претходен договор, да ги укине привремените српски таблички и да почне да ги казнува оние кои не сакаат да ги регистрираат своите автомобили со таблички РКС (Република Косово).