„Интерпелацијата за Димитров е уште еден неуспешен обид на ВМРО ДПМНЕ, и наместо да го поминуваме времето корисно во парламентот, да носиме закони важни за граѓаните, ние во моментот таму имаме пласирање лажни вести, клевети и навреди, она што ВМРО ДПМНЕ знае најдобро да го прави. Не може за тоа што не започнаа преговори со ЕУ вината да биде кај Димитров. Сите се изненадени од одлуката на Бугарија и тоа не е во духот на Договорот за добрососетство, потпишан на двата официјални јазици. Таквата одлука не е во духот на европските вредности. Целиот демократски свет е изненаден од одлуката на Бугарија и ја осуди како неисправна. Ние имаме Договор со Бугарија, преку кој треба да градиме соработка во духот на европските вредности. Можеби кај одредени политичари во Бугарија, сега ќе имаат избори во април таму, ова е своевиден притисок, па единствената карта им е да играат на национализам насочен кон Северна Македонија.“- изјави пратеникот на СДСМ, Костадин Костадинов, на телевизија Канал 5, зборувајќи за неоснованоста на поднесената интерпелација.
Изрази уверување дека преку дијалог и разбирање Северна Македонија и Бугарија ќе најдат заедничко решение со кое ќе се надмине ваквата ситуација.
„Во една ваква ситуација во која ние направивме се за да ги надминеме пречките, не знам што ќе преземе Софија, сега притисокот е врз неа. Сите земји членки се насочени кон Бугарија. Тие може да испорачуваат барања, но ние имаме наши црвени линии, ние сме Македонци со македонски јазик, признати од цел свет. И влезот во ЕУ ќе го направиме така, со нашиот јазик. Ќе ги отвориме европските пазари за македонските граѓани. Некој да ни чепка во сувереноста, да ни чепка во јазикот нема да дозволиме. Бугарија има барања, но тоа се само нивни барања. Наспроти тоа има факти. Веруваме дека по пат на дијалог Бугарија ќе ја прифати реалноста, ќе ги прифати фактите и дека ова ќе се надмине.“- заврши Костадинов.
По кој знае кој пат мораше да повтори дека државниот врв не преговара за идентитетот, за јазикот, за припадноста… и уште еднаш ги увери граѓаните дека нема скриени преговори.