Премиерот Димитар Ковачевски на лидерската средба со лидерот на ВМРО-ДПМНЕ Христијан Мицкоски доаѓа со план и три конкретни предлози, брифираат владини извори за МИА.
На средбата во Клубот на пратеници предвидено е тема на разговор на средбата да бидат одлуките што треба да се донесат во Собранието со цел продолжување на европската интеграција на државата, како и за пристапот на институциите и сите политички чинители во насока на градење и одржување на добрососедски односи.
По завршувањето на средбата планирани се изјави на кои ќе бидат соопштени детали околу разговорот помеѓу двајцата лидери.
Пред лидерската средба се одржа состанок на ИК на ВМРО-ДПМНЕ, по кој партискиот потпретседател Тимчо Муцунски изјави дека став на партијата е оти уставни измени под диктат не смее да има.
Тој додаде и дека една од темите за коишто ќе дискутираат двајцата лидери ќе биде и прашањето за предвремени парламентарни избори.
Одделни извори тврдеа денес дека Ковачевски во пакетот три предлози со кои седна на масата за разговори со Мицкоски, носи и предлог ВМРО-ДПМНЕ да гласа за уставните измени а веднаш откако ќе бидат изгласани да се одржат предвремени парламентарни избори.
С.К.