Затворениот руски опозициски лидер Алексеј Навални се соочува со ново судење под обвинение за екстремизам што може да го држи во затвор со децении.
Навални веќе отслужува деветгодишна затворска казна за „прекршување на условниот отпуст, измама и непочитување на судот“. Тој и неговите поддржувачи инсистираат дека неговото апсење и затворање во 2021 година било политички мотивирано.
Најновото судење започна денес во казнениот затвор каде што тој се наоѓа, на 250 километри источно од Москва. Навални се соочува со повеќе обвиненија, вклучително и создавање екстремистичка мрежа и финансирање екстремистичка активност, што би можело да му ја продолжи затворската казна до 30 години.
47-годишниот Навални долго време е најистакнатото лице на руското противење на претседателот Владимир Путин и повеќе од една деценија ја разоткриваше корупцијата во срцето на руската моќ. Како харизматичен борец, тој е единствениот руски опозициски лидер способен да мобилизира луѓе во голем број ширум Русија за да учествуваат во антивладините протести.
Тој беше уапсен во 2021 година по враќањето од Германија, каде што се опорави од нападот со отров претходната година за кој го обвини Кремљ. Руските власти негираа каква било вмешаност. Навални првично беше затворен на две и пол години за кршење на условите за кауција додека се лекуваше во германска болница, но потоа доби дополнителни девет години за измама и непочитување на судот.
Последниот случај доаѓа во време кога Кремљ ја интензивира репресијата врз противниците, повеќе од една година по инвазијата на Украина, со повеќето клучни опозициски фигури зад решетки или во егзил. Обвинителите за Навални изготвиле обвинение од 3.828 страници во кое се наведени сите наводни злосторства за кои се тврди дека ги извршил додека бил зад решетки.
„Иако од ‘томовите’ обвинение е јасно дека сум софистициран и упорен криминалец, невозможно е да се открие за што точно сум обвинет“, рече Навални.
Тој, меѓу другото, е обвинет за финансирање екстремистичка активност, јавно поттикнување екстремистички активности и „рехабилитација на нацистичката идеологија“.
извор: Би-Би-Си