Тогаш, кога времето ќе биде поминато, ова време сегашно, на несовест и нечовечност, тогаш кога некои други луѓе, потомци на сегашниве нелуѓе ќе ги листаат списоците за отстрел, меѓу кои се и оние на лустраторите, оние со кои нивните предци се изживуваат сега, тогаш некој ќе мора да ја каже вистината.
Потомците на сегашниве нелуѓе ќе бидат први кои ќе поставуваат прашања, први кои ќе ја сфатат тежината на зборот, први кои ќе ја изговорат пресудата- таа не се вика никако поинаку, туку Совест.
Ќе ги глода и притиска овој наслов на една песна на Блаже Конески, чии песни веројатно ќе останат во архивите, ако не бидат во меѓувреме запалени од нелуѓето но и да се случи тоа, од судот на колективната меморија на еден народ не може да се преживее, не може да се дочека ново утро.
Како вели Конески, џинот од Небрегово, кој и не знаејќи, ја посветил оваа песна и на Антонио Милошоски, истиот тој кој го нарекуваше Конески “џуџето од Небрегово”. Затоа што од лентите на прислушување ќе слушнеме дека Милошоски е еден од нарачателите на лустрација кај егзекуторот, Томе Аџиев.
“А тоа сонце пече право в теме.
Сосем си гол.
Нигде сенка.
Залудно ги креваш рацете над глава.
Шмука и пече совеста”.
Ќе дојде ден, кога потомците на овие нелуѓе, месо на нивното труло месо, крв на таа нечиста крв, совест на нивната несовест, човечност на оваа нечовештина, ќе замолчат пред доказите, документите, сведоштвата, поезијата, тетарските претстави, книгите, уметничките дела, научните трудови, новинарските текстови, анализи и истражувања на Славко Јаневски, на Љубомир Фрчкоски, Владимир Милчин, Ѓунер Исмаил, Јадранка Костова, Томе Серафимовски, Божин Павловски, Ѓорѓи Спасов….
После невремиња, доаѓаат денови кога прогонува совеста и соголува- и предците и потомците нема да можат да се одбранат од незаборавот на крвожедноста на лустраторите. И да ги искинат и запалат сите страници од историјата, сите записи и документи, нема да можат да се ослободат од сеќавањата, макар биле само на еден човек, дури и само тој да остане. Тој ќе ги потсетува на совеста и тој ќе биде самата совест.