Тропската бура Елза доцна во понеделникот ја „напушти“ Куба, тргнувајќи кон север, односно кон американската држава Флорида, иако поројните дождови над островот продолжија, објави Ројтерс.
Националниот центар за мониторинг на урагани на САД во 23 часот објави дека Елса се движи со 19 км на час.
Повеќе од 100.000 Кубанци беа евакуирани од подрачја склони кон поплави или од домови кои се најдоа на патот на невремето. Илјадници се засолниле во државните засолништа.
Иако Куба успева често да избегне жртви од невреме, овојпат тоа се случува во услови на тешка пандемска ситуација и стравувања од бум на инфекции.
Од друга страна, кубанските метеоролози изјавија дека дождовите може да бидат добри за земјоделството и да ги зголемат резервите на вода, се додека не бидат премногу интензивни.
Елса претходно однесе најмалку три животи во Доминиканската Република и на островот Света Луција.