Лидерката на крајната десница во Франција Марин Ле Пен изјави дека ЕУ претставува „меѓународна аномалија” и дека ќе и се случи истата судбина како Советскиот Сојуз.
„На Европската унија, како и на Советскиот сојуз, им нема спас. Сакам Европа повторно да стане унија на суверени држави”, рече Ле Пен за француското радио RFI, истакнувајќи дека европскиот блок „ќе се распадне како што се распадна и Советскиот сојуз”.
Таа додаде дека ЕУ претставува „меѓународна аномалија”, истакнувајќи дека со распадот на СССР не дојде до смрт на земјите-членки и дека тоа нема да се случи ниту со земјите членки на ЕУ.
„Тоа го предлагам за Европа…да се врати кон просперитетот и безбедноста во контекст на соработката меѓу државите кои слободно можат да соработуваат или да не соработуваат ако сметаат дека тоа не е во интерес на нивните народи”, рече Ле Пен.
Лидерката на францускиот Национален фронт изјавата ја дава во неделата во која во Франција се најавени отпуштања на повеќе стотици работници, истакнувајќи дека за кризата на пазарот на трудот е виновна „нелојалната конкуренција” како од земјите од ЕУ, така и од оние надвор од Унијата.