Лекарите бараат одговорност од министерот за здравство Никола Тодоров и од првиот човек на Лекарската комора, Кочо Чакаларовски бидејќи не направиле ништо за да ја заштитат лекарската фела.
По инцидентот што се случи утринава, кога пациент пукаше во хирург и го рани во ногата, лекарите бараат од Лекарската комора да си ја преиспита својата работа и да изготви закон со кој ќе ја ги заштити лекарите. Револтирани се поради настанатата ситуација и сметаат дека Тодоров со својата политика ја загрозил нивната безбедност. Тие бараат професионални луѓе да ги водат Министерството за здравство, Фондот и Лекарската комората каде што претседателот е пензионер.
На клиниките пак, нема речиси никакво обезбедување, а нападите врз докторите во последните две години зачестија. По инцидентот лекарите се собраа во амфитеатарот на Хируршките клиники за да заземат став околу нападот на нивниот колега.
„Бараме морална одговорност од министерот за здравство, Законот за здравствена заштита да се врати како што беше пред 2011 година, од кога со измените лекарите се доведени во ваква состојба, а Лекарската комора да предложи закон за лекари што Владата ќе го прифати без забелешки“, изјавија лекарите по денешната средба.
Но, малкумина од нив одважија да зборуваат пред камерите. Дури на новинарите им беше забрането да влезат на состанокот на Хируршките клиники.
„Кој пука во лекар пука врз самиот себе. Денеска на нашиот колега му е беше загрозен животот, треба сите да реагираат “, рече Викторија Вујовиќ од Клиниката за психијатрија.
“Крајно време е да се преземе нешто за безбедноста на лекарите, бидејќи после ова сите лекари ќе одат со чувство на несигурност и страв на работа. Ова што се случи сега е крајно сериозно“, изјави Викторија Чаловска од Клиниката за гастроентерохепатологија.
Љубомир Огненовиќ, лекарот од Абдоменална хирургија, врз кој беше пукано утринава, е во стабилна состојба, откако врз него беше извршен оперативен зафат. Тој се здобил со три огнострелни повреди во ногата.
Хируршките клиники ги отворија вратите за пациентите, но операции денеска нема да се вршат.
Вистинска заложничка драма се случувала утринава на Клиниката за абдоменална хирургија. Хирургот Огненовиќ кој оперирала пациентка, која според лекарите била во терминална фаза од карцином, излегол од операционата сала за да му соопшти на синот дека мајка му починала. Според кажувања на очевидци, синот во тој момент извадил пиштол и почнал да пука на сите страни.
Пациентите и вработените легнале на подот, а напаѓачот пукал во лекарот и медицинската сестра која успеала да го избегне куршумот. Хирургот се здобил со три влезно-излезни повреди од куршумите. Во еден момент на напаѓачот му се заглавил пиштолот и тој заедно со уште двајца кои биле во негова придружба почнале да кршат се пред себе.
Веднаш била повикана полиција, по што тројцата напаѓачи се уапсени.