Електронски систем за следење кој ќе покажува каде во моментот се наоѓаат лекарите, предвидуваат измените на Законот за здравствена заштита кои добија зелено светло на Комисијата за здравство по што влегоа во собраниска процедура.
Централниот систем на BSC (Balansed Scorecard) е електронски систем кој ќе врши евидентирање на медицинскиот персонал на нивното присуство во просториите на болниците, особено во амбулантите, операционите сали, одделенијата, во просториите каде што се прават дијагностички интервенции, како и нивното доаѓање и одење од работа.
Проверување на личниот идентитет ќе се врши со скенер со биометриски сензор поставен во секоја јавна здравствена установа. Овој систем ќе покажува и како биле лекувани пациентите, односно во детали кој лекар колку лекови му дал на пациентот.
Во забелешките, Лекарската комора предупредува дека овој систем се меша во медицинските протоколи. Пратеничката на ДУИ, Мирсада Асани потенцира дека нема потреба лекарите да се следат каде се во секој момент, бидејќи тие што сакаат да доаѓаат на време на работа и да работат, тоа го правата без притисоци.
Сепак, во изјава за НОВА, пратеничката Асани се осврна повеќе на другите моменти, како што е Мој Термин и како и учењето на албанскиот јазик на сите лекари.
„Имав забелешки на „Мој термин“ бидејќи не се согласувам со времетраењето на прегледот. Сметам дека 15 минути не се доволни за преглед, особено за психијатриските болни. Но, добив одговор дека Лекарската комора ќе го одредува времето за прегледи. Што се однесува до обуката на специјализантите во странство која ќе биде задолжителна, ќе биде тешко да си го овозможат тоа бидејќи тој дел нема да го покрива Министерството за здравство“, изјави за НОВА пратеничката Асани која е лекар по професија.
Таа нагласи дека погрешно се сфатил делот од измените во законот каде се вели дека државниот испит ќе се полага пред комисија од Министерството за здравство.
„Тоа ќе биде Комисија избрана од Лекарската комора, професори и доктори на науки кои ќе бидат од областа на која што специјализираат лекарите“, изјави Асани.
Измените предвидуваат и парични казни за пациентите кои не можеле да дојдат на преглед, а претходно не го откажале прегледот. Во законот стои дека Јавната здравствена установа може да побара пациентот да си го плати прегледот или интервенцијата доколку повеќе од двапати во месецот , односно четири или повеќе пати во текот на годината го откажал прегледот без да го почитува рокот на откажување. Лекарите пак, кои ги упатиле пациентите на снимање на компјутерска томографија или на резонанца, а 20 проценти од резултатите биле негативни, ќе мора да одат на обука. Во забелешките Лекарската комора бара ова ограничување да се тргне бидејќи постои опасност лекарите да ги праќаат пациентите на снимање дури кога ќе бидат сигурни дека ќе има позитивен резултат.