Кинотеката со нејзиното летно кино „Мирно лето“ најавува вистинска забава во вечерните часови во (нај)топлиот месец – август.
Августовската програма ја започнуваат со неколку актуелни француски филмови. Играниот „Париз – љубовна приказна“ на Жак Одијар е забавна колекција на испреплетени приказни за ликовите што се спојуваат во 13-от арондисман на француската престолнина, а документарниот „Кадифена кралица“ на авторите Мари Амиге, Венсан Миние, ни раскажува сторија за потрагата по снежниот пантер. Следува „Се помина добро“, суптилна драма со добро познатиот ракопис на Франсоа Озон, овојпат на секогаш контроверзната тема за евтаназија – убиство од милосрдие.
„Вселенско момче“ на Оливие Перу, филм за најмладата публика со приказна за 11-годишно момче кое има голема љубов кон вселената и науката. Јапонскиот филм „Тркало на среќата и фантазијата“ на Рајусуке Хамагучи раскажува три приказни за три женски ликови и ги следи односите меѓу нивните избори и каењето: неочекуван љубовен триаголник, неуспешна замка за заведување и средба која произлегува од едно недоразбирање.
Во августовската програма повторно ќе има проекции, на како што посочуваат, исклучителниот француски филм „Титан“ на Жулија Дукурно, филмска бајка за возрасни исполнета со гнев, љубов и осаменост, која ја освои „Златната палма“ во Кан во 2021 година, а Дукурно ја подели јавноста со оваа контроверзна филмска сторија. Филмот забележа над 110 номинации на филмските фестивали, освои 28 награди, а со него свечено беше затворено минатогодишното 42. издание на ИФФК „Браќа Манаки“ во Битола.
На програмата е и германскиот филм „Фабијан“ на Доминик Граф со приказна сместена меѓу подстанарите на Берлин и неговото подземје во 30-те години од минатиот век, каде што борделите се уметнички ателјеа, а на улиците се нацистите со нивните гласни и навредливи пароли, освои петнаесетина номинации и шест награди на германските филмски фестивали.