Претседателот на Нигерија Гудлак Џонатан побара меѓународна помош во истрагата за 276-те киднапирани девојки, за што е осомничена организацијата Боко Харам.
Тој во неделата побара помош од американскиот претседател Барак Обама, а се обрати и до лидерите на Велика Британија, Франција и Кина.
– Ова се ужасни времиња за земјата, болно е, рече во својата порака Џонатан кој побара трпение и соработка од родителите и локалните власти.
– Ќе ги надминеме овие предизвици со безбедноста, потенцираше тој, објаснувајќи дека Нигеријците оправдано го истураат бесот врз владата. Тој вети дека исчезнувањето на девојките нема да заврши како „уште една глобална мистерија“.
Американскиот државен секретар Џон Кери недаомна од Етиопија порача дека САД ќе обезбеди поддршка во спасувачките обиди.
– Киднапирањето на стотици деца од страна на Боко Харам претставува бескрупулозен криминал, и ние ќе направиме се што можеме за владата на Нигерија да ги врати овие млади девојки во нивните домови, а одговорните ќе ги соочиме со правдата, истакна Кери.
Засега неофицијални информации од селаните, укажуваат дека некои од девојките кои беа киднапирани од хостел во градот Чибок на 14.април, биле продадени, а други биле изнесени надвор од границите на Нигерија, во Камерун и Чад.