Поранешниот врховен судија што беше уапсен во полициската акција „Ликвидација“ од петокот наместо во домашен притвор е ставен во притвор во истражниот затвор во Шутка, објавува Нова Македонија.
Информацијата ја потврди неговиот адвокат Јован Јоанидис, кој за „Нова Македонија“ ваквата одлука на судот ја оцени како целосно несоодветна.
– Притворениот судија има сериозни здравствени проблеми и затоа се жалел пред судот наместо домашен притвор да му биде изречена мерка одземање на личните документи како мерка со која ќе се гарантира неговото појавување пред суд. Но наместо судот да го разгледа ваквото барање, тој експресно ја прифатил жалбата на јавното обвинителство кое барало наместо домашен притвор осомничениот судија да биде ставен во притвор во затворот во Шутка – вели Јоанидис.
Осомничениот судија беше единствениот што наместо притвор судот му изрече мерка домашен притвор.
Со ставањето зад решетки тој им се придружи на останатите, меѓу кои и на новинарот на „Нова Македонија“, Томислав Кежаровски, за кого новинарите побараа тој да биде пуштен од притвор и да се брани од слобода, затоа што образложението на истражниот судија нема доволно аргументи зошто новинарот треба да остане во затвор до почетокот на судењето.