Актуелниот градоначалник на Тирана, Љуљзим Баша е избран за нов лидер на Демократската партија на Албанија.
Од евидентираните над 105.000 членови на партијата, своето гласачко право го оствариле само 41.360 од нив.
Баша освоил околу 80 отсто од гласовите, а неговиот противкандидат, министерот за транспорт и јавни работи во заминување Сокол Олдаши, 20 отсто.
Од формирањето во 1991 година, цели две децении на чело на партијата беше Сали Бериша, а само во кус меѓупериод лидерската функција ја имаа Едуард Сељами и Тритан Шеху.
Потеклото на Љуљзим Баша е од Дебар. По професија е правник. Тој беше еден од најблиските соработници на Бериша и за време на осумгодишното владење на демократите беше министер за транспорт и врски, министер за надворешни работи и министер за внатрешни работи, а во 2011 година на локалните избори стана градоначалник на Тирана, победувајки го лидерот на левицата Еди Рама.