Од синоќа на полноќ со барање за повисоки плати 5.400 пилоти на Луфтханза започнаа тридневен штрајк, откажани се над 3.800 авионски летови, а засегнати се повеќе од 425 илјади патници.
„Луфтханза“ им понуди на патниците одлагање на резервираните патувања или користење на железницата или на други авионски компании. Мало олеснување ќе преземат концерните-ќерки „Свис“ и „Остриан ерлајнс“, кои со поголеми авиони ќе летаат на дестинации кои се погодени од штрајкот.
Досега пилотите можеа со 55 години да престанат да летаат, а „Луфтханза“ до старосната граница за пензија им плаќаше до 60 проценти од бруто заработувачката. „Луфтханза“ еднострано ја откажа оваа можност, планирајќи на подолг рок да ја зголеми границата за прдвремено заминување во пензија на 60 години, што синдикатот на пилотите, Кокпит, решително го отфрла.
Синдикатот, освен тоа, бара и значително зголемување на платите – десет проценти за две години, додека „Луфтханза“ е подготвена да плати зголемување од 5,2 проценти и еднократна парична исплата.