Светски познатиот поет од Македонија, Никола Маџиров до крајот на месецот ќе престојува во Брисел, откако беше избран за автор-гостин на една од најзначајните европски книжевни резиденции „Паса Порта“.
Стипендијата најчесто им се доделува на прозни автори и досега ја добиле и поетот со српско потекло Давид Албахари, како и добитникот на Пулицер, и автор на филмуваниот роман „Часови“ – Мајкл Канингам.
Од македонските автори гостин во оваа книжевна резиденција веќе бил Гоце Смилевски.
Поезијата на Маџиров е објавена и во најновиот број на специјализираното поетско белгиско списание „Поезие крант“, а во рамките на престојот предвидени се книжевни средби на Маџиров со белгиската публика на 8 февруари во Антверпен и потоа во Гент.
По престојот во Брисел, Никола Маџиров го очекуваат читања и престои во САД, Шведска, Германија, Велика Британија, Летонија и други земји.