Џ.К. Роулинг, авторката на Хари Потер, најави дека ќе даде 1,2 милиони евра за кампањата “Подобро заедно” која е против независноста на Шкотска од Велика Британија.
Оваа британска авторка која живее во Едимбург веќе 21 година, ги објасни своите причини зошто е против независноста на Шкотска. На 18 септември е закажан референдум на кој Шкотланѓаните ќе треба да се изјаснат за предлогот за независност. Во долга интернет порака “мајката” на Хари Потер вели дека долго ги слушала аргументите на оние кои се против и оние кои се за.
“Колку што подолго ги читам независните извори на оваа тема толку повеќе сум убедена дека независноста може да ни донесе можности – сите промени носат можности – но исто така таа носи и ризици”, вели таа.
Писателката признава дека не е голем поддрувач на сегашната британска влада, но додава дека е свесна како Велика Британија ја спасила Шкотска од економска катастрофа кога требало да се надокнадат долговите на банките за време на последната криза.
“Вистината е дека Шкотска живее под истата пресија во 21 век како и останатиот дел од светот и мора да се бори во истиот светски пазар. Колку што повеќе ја слушам кампањата за независност толку повеќе сум загрижена од начинот на кој таа кампања ги минимизира и негира ризиците”, вели таа.
Според неа, останувањето во Велика Британија ја става Шкотска во привилегирана позиција како на сопруга која решила да замине па во последен момент се решила да му даде на бракот уште една шанса. “Сите политички партии ни се додворуваат и предлагаат нов овластувања за да ја направат Шкотска среќна”, заклучува таа. И додава дека Шкотска никогап не била во така добра позиција за да ги наметнува условите доколку реши да остане во Велика Британија.
Но, вели таа, доколку мнозинството Шкотланѓани одлучат дека сакаат независност “се надевам дека тоа ќе биде голем успех затоа што ја сакам оваа земја и сакам таа да биде просперитетна”.