Македонските граѓани заглавија во рекорден минус на картичките. Минусното салдо на тековните сметки создадено со пречекорување на платата заклучно со јуни достигна до 85 милиони евра, објавува Капитал.
Граѓаните се повеќе посегнуваат по минусот на картичките како наједноставен но и најскап начин на финансирање, главно поради малите плати и зголемените трошоци, барајќи начин како да се преживее. Растот на вредноста на минусното салдо на тековните сметки се должи и на тоа што банките драстично го намалија кредитирањето, но не се откажаа од надминување на лимитот на картичките.
Банките во борбата да привлечат што повеќе клиенти најчесто дозволуваат пречекорување на два редовни приливи од плата или пензија. Дозволеното надминување на лимитот може да го користат сите клиенти кои имаат трансакциска сметка и редовно примаат плата или пензија.
Банкарите признаваат дека има огромен интерес за коиристење на дозволено пречекорување на трансакциски тековни сметки.
Од банките потврдуваат дека имаат одредени проблеми при наплатата на долговите од минусните салда, но состојбата не била загрижувачка. Најпроблематични биле граѓаните кои престанале да работат, тие веќе не добиваат приливи на сметките од плата, а тогаш дозволениот минус станува недозволен. За такво недозволено надминување, банките наплатуваат повисока казнена камата.