Американското министерството за правда соопшти дека македонски и руски државјанин се осудени на казна затвор за нивните улоги во транснационална операција за компјутерски криминал, одговорна за кражба на 568 милиони долари ширум светот.
31 годишниот македонски државјанин Марко Леопард е осуден на 5 години затвор, а 33 годишниот руски државјанин Сергеј Медведев на 10 години затвор. Двајцата претходно се изјасниле за виновни.
Медведев е ко-основач и администратор на Инфрауд, онлајн криминално претпријатие кое постоело за да ги збогати своите членови и соработници преку огромен број кривични дела, како кражба на идентитет и финансиска измама, наведува министерството. Тој беше уапсен во Тајланд во 2018 година. Леопард, како што се наведува, дејствувал како администратор на членовите на Инфрауд, помагајќи во продажба на нелегална стока и услуги.
Во ажурираното обвинение, Министерството за правда во декември 2020 година објави дека 36 лица биле обвинети за нивната наводна вмешаност во водење на „Инфрауд“. Во него се наведува дека меѓународните органи за спроведување на законот уапсиле 13 обвинети од САД, Австралија, Велика Британија, Франција, Италија, Косово и Србија.