Во Италија веќе има 7 починати и 283 заразени од коронавирус. Македонецот, Марјан Атанасов кој живее до зона со карантин, на скоро 20 километри каде што беа откриени првите заразени случа за НОВА раскажува дека маркетите се празни, граѓаните во паника прават залихи со храна, а нема ниту заштитни маски
Потврден е прв случај на коронавирус во Тоскана, во Фиренца и наверојатно уште еден случај во Пистоја за кој се чекаат резултатите, објавија италијанските медиуми. Ноќеска тестот го открил присуството на коронавирусот Ковид -19 кај нив. Во Италија веќе има 283 заразени и 7 починати.
Заболениот, претприемач од Фиренца се вратил од Источна Азија на почетокот на јануари и се прават обиди да се открие дали би можел да биде заразен во Италија од вработен, кој бил болен пред неколку недели. Лицето заразено во Пистоја, 49-годишен компјутерски инжењер е во доброволна изолација и тој штотуку ќе се вратил од Кодогна.
Патничката од Бергамо која е на годишен одмор во Палермо и е позитивна на коронавирусот синоќа е примена во болницата во Цервело, откако покажала симптоми на грип. Карантин е спроведен и за групата пријатели на жената и за луѓето кои биле во близок контакт со туристите. Ова е прв случај на коронавирус пронајден во Јужна Италија.
Италија стана ново жариште на коронавирус и тоа во Европа.
Заболените има од различни региони на Италија како што е Ломбардија (Милано), Венето (Венеција), Емилија Ромања (Болоња), Пиемонте (Торино) и Лацио (Рим). Во северниот дел на Италија, во 11 региони веќе се забранети сите јавни манифестации, фудбалски утакмици, посети на музеи, саемски и модни презентации, карневалот во Венеција, школски ескурзии , собирања на повеќе луѓе, се тоа на неодредено време. Околу 50 000 луѓе кои живеат во 10 села во јужна Ломбардија не смеат да излегуваат од регионот на карантин.
Македонецот, Марјан Атанасов кој долги години живее и работи во Италија за НОВА раскажува дека во зоната на карантин задолжително функционираат супермаркетите заради снабдување со храна и аптеките, а сите останати дејности се затворени. На граѓаните им е соопштено, доколку немаат потреба, да не излегуваат од своите домови и да не се изложуваат на евентуална опасност од можна зараза.
Марјан Атанасов, кој живее во Пјаченца
Тој живее во пограничната зона со карантин, на скоро 20 километри каде што беа откриени првите заразени случаи. Вели дека само реката По го дели регионот на Емилија Ромања со Ломбардија. Атанасов објаснува дека маркетите и помалите продавници се испразнети, граѓаните во паника прават залихи со храна.
„Јас живеам во пограничната зона со карантин и одам на работа, нормално следејќи ги инструкциите на локалните власти и немам ништо со мене како заштита. Населението е загрижено, се прават резерви на храна и други домашни потреби, испразнети се сите продавници со тестенини, сосови, конзерви на грав, леќа, боранија, маслиново масло, брашно, шеќер, вода, месо и сувомеснати производи“, вели Атанасов за НОВА.
Празни рафтови во продавниците во Пјаченца
Тој објаснува дека привремено се затворени сите училишта и градинки, никој не смее да влезе или излезе од зоната на карантин, дека има блокади од војската иполицијата во придружба со амбулантни возила и медицински персонал во три смени.
„Но, нема доволно заштитни маски и ракавици за населението, луѓето немаат ниту за еднократна употреба, не пак да имаат и резерва. Тоа се специјални маски за заштита со јаглен, за може да се дише со нив нормално“, вели Атанасов.
Во меѓувреме, хотел во Тенерифе на Канарските острови во Шпанија е затворен откако еден италијански лекар кој престојувал таму бил позитивен на тестот за коронавирус. Докторот, наводно, е од регионот на Ломбардија, каде што италијанските власти се борат со појавата на коронавирусот.
На стотици гости во хотелот со четири звезди им било соопштено да не излегуваат од своите соби бидејќи се вршат медицински тестови, а хотелот е биде изолиран се додека здравствените власти не го соопштат тоа, јавуваат шпанските медиуми.
Во исто време, кога во светот беснее опасниот вирус и кога секоја информација е драгоцена, кога мора да има брз проток на информации во Македонија од денска е мрак, операторите ги исклучија сите домашни и странски канали.
