Во текот на изминатата 2021 година, македонските винарии извезле вино во вредност од 61,4 милиони долари, што е зголемување од 19,1 отсто во споредба со претходната 2020 година.
Виното е еден од ретките извозни производи со кои Македонија како извозник котира повисоко на светските извозни ранг листи.
Така, според последното рангирање на Worldtopexports, Македонија лани била 29-ти најголем извозник на вина во светот.
Во регионот, пак, Македонија е еден од лидерите според вредноста на извезеното вино, односно втор најголем извозник по Грција. Грција со извоз од 100 милиони долари минатата година е рангирана на 25 место на листата на најголеми извозници на вино во светот.
Најголем извоз на вино традиционално веќе со години наназад имаме во Србија. Минатата година во Србија биле продадени македонски вина во вредност од 14,8 милиони долари. Втор најголем извозен пазар за македонските вина е Германија, каде е извезено вино во вредност од 9,8 милиони долари.
Следат Хрватска со извоз од 9,6 милиони долари минатата година, БиХ со извоз вреден 4,4 милиони долари и Бугарија со извоз од 3,5 милиони долари.
Кина лани била седми најголем извозен пазар за македонските вина со извоз од над 1,9 милиони евра.
Лани на десет пазари имало извоз на македонски вина поголем од 1 милион долари и на овие пазари е реализиран скоро 90 отсто од вкупниот извоз на вина.
Македонската винска индустрија е една од ретките нето извозни индустрии во земјава, бидејќи и суровините кои ги користи за производство се речиси во целост домашни.
Според податоците од Асоцијацијата Wines of Macedonia над 85 отсто од вкупно произведеното вино се извезува на близу 40 странски пазари, а 15 отсто се продава на домашниот пазар. Околу 50 отсто од произведените македонски вина се извезуваат во шишиња, додека останатото се продава на странските пазари како наливно вино. Најголеми извозни пазари за флаширано вино се земјите од регионот, додека најголем дел од наливното вино се извезува во Германија.
Винската индустрија во Македонија е високо фрагментирана и во неа работат 74 регистрирани винарии, од кои околу 90 отсто се со капацитет помал од 5 милиони литри, а само четири се поголеми винарии со капацитет помеѓу 15 и 50 милиони литри. Најголема винарија и најголем извозник на вино од земјава е винаријата Тиквеш.
Извор: izvoz.mk