Македонија денеска гласа на шестите по ред локални избори за избор на градоначалници и општински советници. Изборите се во 80 општини и во градот Скопје, има 2.976 гласачки места својот глас, а според избирачкиот список, право на гласа имаат 1.743.403 граѓани, а од од нив, 62.908 се со престој во странство.
Право на глас има секој граѓанин на кој наполнил 18 години и е запишан во избирачкиот список, а идентификацијата се врши со биометриски лична карта или пасош. Правото на гласање е само еднаш, само во свое име и е тајно, а гласачкото ливче не смее да се даде на комисијата или на други лица.
Процедурата на гласање е следна: се добиваат две гласачки ливчиња- со името на кандидатите на градоначалник и на општинските советници,но во Скопје избирачите добиваат четири ливчиња.
Што се однесува до пропишаната излезеност за успех на изборите, потребни се најмалку 33 % од запишаните гласачи во избирачкиот список, додека потребни се 51% од гласовите за избор на градоначалник во првиот круг. За евентуален втор круг не е потребен лимит на процентуалност и доколку до него дојде, гласањето е за 2 недели, односно на 7 април 2013 година.
МВР предупредува дека нема да се толерира никаква узурпација или нарушување на изборниот процес, со објаснување дека Републичкиот оперативен штаб ги завршил сите подготовки за обезбедување мирен, фер и демократски изборен процес. Обезбедувањето опфаќа физичка безбедност на објектите каде се наоѓаат гласачките места и приодот до нив за време на гласањето, физичка безбедност на гласачките материјали и лична безбедност на гласачите, кандидатите, партиски работници или претставници, членови на ИО, акредитирани набљудувачи и воопшто јавноста.
И овие избори имаат домашни и странски монитори- се работи за 8.379 домашни и 410 странски набљудувачи.
И Народниот правобранител годинава ќе биде вклучен во изборниот процес- од кога ќе почне гласањето, па се до затворање на гласачките кутии ќе функционира бесплатната телефонска линија 0800-54321 на која граѓаните ќе можат да пријават каква било повреда на избирачкото право.
Отворени за граѓаните ќе бидат и сите седум канцеларии на Народниот правобранител во Скопје, Битола, Kичево, Kуманово, Струмица, Тетово и Штип, за да им се помогне во остварувањето и заштитата на нивните избирачки права.
Молкот трае се до 19 часот, кога се затвораат гласачките места.