Фејсбук објави дека седум компании, од кои една е од Северна Македонија, ја искористиле нејзината платформа за да шпионираат 50.000 луѓе во 100 земји. Другите компании се лоцирани во Кина, Израел и Индија, објави Дојче Веле.
Како што објави Фејсбук, речиси 50.000 корисници биле мета на обиди за хакерство од компании за надзор кои работат за владини агенции или приватни клиенти, соопшти компанијата во четвртокот. Ваквите сознанија се резултат на повеќемесечна истрага на Мета, мајката на Фејсбук, за таканаречени „сајбер-платеници“ кои се занимаваат со „надзор за изнајмување“.
Според Вашингтон пост, една од седумте компании е македонската компанија Сајтрокс (Cytrox) развивач на софтвер за iPhone и Android. Името на оваа фирма, како што се наведува, било објавено во Форбс во 2019 година, кога се појавил „сојузот“ за надзор основан од Кипар и Израел, наречен Интелекса (Intellexa) што го купик Сајтрокс за 5 милиони долари.
За Сајтрокс (Cytrox), во извештајот на Мета се наведува дека биле отстранети 300 Фејсбук и Инстаграм профили на компанијата кои биле користени за да се вклучуваат и измамуваат цели, а се наведуваат и 10 држави во кои Сајтрокс имала муштерии, меѓу нив Египет, Ерменија, Грција, Саудиска Арабија, Оман, Колумбија, Брегот Слонова Коска, Виетнам, Филипините и Германија. Софтверот на македонската фирма се викал Предатор.