Македонските болници ќе добијат чаршави, кебиња и перници од турската невладина огранизација ТИКА, најави министерот за здравство Арбен Травари. Во моментот и Министерството со пари од сопствениот буџет веќе набавува чаршави како прва помош за болниците каде што нема ниту чаршави, ниту пижами за болните.
„Од буџетот на Министерство веќе се набавуваат чаршави, а од ТИКА ни најавија дека ќе донираат чаршави, ќебиња и перници. Нивни претставници веќе беа во Министерството и прашаа што е тоа што ни е итно потребно и дека може да помогнат. Им реков, ако може чаршави, ќебиња и перници, на што одговорија дека тоа веднаш може да го добиеме“, изјави Травари на брифингот со новинарите.
Покрај тоа што се во очајна состојба со основни работи, во болниците голем проблем е хигиената. Пациенти умираат од болнички бактерии кои виреат во операционите сали и болничките соби.
Таравари најави дека планираат да ангажираат надворешни специјализирани фирми. Но, за ова тој допрва треба да разговара со министерот за финасии за да се изнајдат дополнителни средства за оваа намена.
„ Ова е голем проблем, дури и високиот процент од доенечка смртност се должи на интерхоспитални инфекции. Размислуваме да ангажираме надворешни фирми кои ќе се грижат за комплетната хигиена во болниците и клиниките. Така работат во приватните болници, но и секаде во свет е така. Во моментот правиме студија за да видиме колку ќе чини сето тоа, а да направиме можност и хигиеничарките кои се вработени кај нас да бидат примени во фирмата која ќе биде избрана да чисти. Трошоците може да се покријат дел со средства од Министерството, а дел од самите клиники“, најави Таравари.