„Медиумите најчесто пишуваат за европеизацијата како за формални чекори во процесот на придружување и во контекст на прашањето за името. За самата Европска Унија доминираат прилози кои како тема ја имаат економијата и стопанството“, се вели во истражувањето спроведено во рамките на Регионалната програма за поддршка на истражувањата од областа на општествените истражувања во Западен Балкан (RRPP).
Истражувањето под наслов „Европа овде и сега: дискурзивна анализа на европеизацијата во медиумите од Западен Балкан“ е спроведено од група автори во месец октомври 2012 година, и опфаќа 48 медиуми од Босна и Херцеговина, Црна Гора, Србија, и Македонија.
„Актерите на европеизацијата кои се претставени во медиумите изнесуваат претежно позитивни ставови за овој процес. Фактот дека анализираните медиуми се занимаваат со дневни настани, го одредува и начинот на кој тие пишуваат и говорат за европеизацијата. Актуелните настани го диктираат медиумското известување за европеизацијата, додека мал дел од текстовите/прилозите претставуваат аналитично третирање на оваа тема“, вели доц. Д-р Дејан Донев, лидерот на тимот кој го спроведуваше македонскиот дел од истражувањето.
Во поглед на новинарската практика, во истражувањето се наведува дека „дури 67% од истражуваните прилози, немаат наведено автор, што упатува на преземање на информации од други извори, најверојатно агенции“.
Во рамките на истражувањето во делот на медиумите од Македонија беа опфатени вкупно девет медиуми.
Од дневниот печат, „Дневник“, „Вест“ и неделникот „Капитал“, од радио станиците, „Македонско Радио 1“ и „Канал 77“, „МТВ 1“, „Телма“ и „ТВ Тера“ беа опфатени од телевизиските медиуми, и онлајн изданието „a1on.com.mk“.