Францускиот претседател Емануел Макрон ги повика европските компании да престанат да инвестираат во САД, откако претседателот Доналд Трамп ги оствари најавите за сеопфатна трговска војна, воведувајќи високи царини за стоки увезени од Европската унија и од многу други делови од светот.
Макрон рече дека „нема смисла да се инвестира во САД додека таа земја се бори против Европа“, пренесе „Политико“.
Каква би била пораката ако големите европски играчи инвестираат милијарди во американската економија во исто време кога САД нè погодуваат нас?, рече Макрон.
Говорејќи во пресрет на состанокот со претставниците на индустриските групи погодени од царините, тој истакна дека сега е неопходно да се има колективна солидарност.
Во средата Трамп објави царини од 20 отсто за увозот од Европската унија, кои ќе стапат на сила на 9 април.
Американскиот претседател ги именуваше француската компанија за поморски услуги CMA CGM SA и производителот на автомобили „Стелантис“ како компании кои „неодамна инвестираа во САД благодарение на него“.
„Стелантис“, кој меѓу другите ги произведува автомобилите „Фиат“, „Алфа Ромео“, „Опел“, „Пежо“, „Ситроен“, „Џип“ и „Масерати“, на почетокот на годинава најави дека ќе инвестира 5 милијарди долари во своите американски операции, целејќи да го зголеми пазарниот удел.