Младата Пакистанка Малала Јусуфзаи, која пред една година го преживеа талибанскиот атентат, му изразила на американскиот претседател Барак Обама загриженост поради американските напади со беспилотни летала врз цели во нејзината татковина.
-Изразив загриженост поради нападите со беспилотни летала, што го поткрепува тероризмот”, изјавила 16-годишната Малала Јусуфзаи по средбата до петокот во Белата куќа со претседателот Барак Обама и неговата сопруга Мишел.
-Невини жртви гинат во тие акции, кои го поттикнуваат незадоволството кај пакистанскиот народ”, рекла Малала која во четвртокот ја прими наградата Сахаров со која Европскиот парламент им одава признание на борците за човекови права и беше фаворит за Нобеловата награда за мир која ѝ беше доделена Организацијата за забрана на хемиското оружје (OPCW).
Вашингтон ги користи беспилотните летала за напади врз засолништата на исламистичките борци во тешко пристапните планински подрачја во северозападен Пакистан.
Официјален Исламбад декларативно се спротиставува на овие напади протестирајќи дека тоа е кршење на пакистанскиот суверенитет, но аналитичарите сметаат дека станува збор за договор меѓу двете влади. Покрај тоа, пакистанската влада предупредува дека со ваквите напади во кои неретко страдаат и цивили, може да се предизвика и анти-американско расположение кај локалното население во паштунските племенски област што ќе ја зајакне позицијата на талибаните и радикалните исламисти.
Вашингтон одбива јавно да зборува за употребата на беспилотните летала, но пакистански разузнавачки и владини претставници велат дека во овие напади досега се убиени неколку високи членови на Ал Каеда и талибански водачи.
Припадник на групацијата Техрик-е-Талибан на 9. октомври 2012 година ја застрела Малала во глава во градот Мингор во долината Сват, северозападна пакистанска полуавтономна планинска паштунска област во која талибаните го воведоа строгото шеријатско право во периодот од 2007 до 2009 година.
Во февруари годинава повеќечлена екипа медицински експерти пет часа ја оперираше Малала Јусуфзаи во болницата „Кралица Елизабета” во Бирмингем, по што беше префрлена на лекување во Велика Британија. Лекарите извршија реконструкција на черепот со поврзување на черепот со плоча од титаниум и имплатација на кохлеата со што и е вратен слухот.
Нападот на Малала Јусуфзаи Tалибанците го преземаа како одговор на нејзините критики на својот блог за нивните политики во образованието, особено кон жените. Малала својот блог го започнала на 11-годишна возраст. И покрај тоа што нејзиниот онлајн дневник беше воден под псевдоним, Талибанците го открија нејзиниот идентитет откако девојчето беше одликувано со Националната награда за храброст, а беше номинирана и за меѓународната детска награда за мир.